Stórmót ÍR lauk í gær sunnudag og komu HSÞ keppendur heim glaðir og ánægðir eftir vel heppnað mót.
Farið var frá Húsavík með rútu frá Fjallasýn og lagt af stað kl. 13:30. Með í för voru 20 keppendur, 2 fararstjórar, 2 þjálfarar og 2 foreldrar. Ferðin suður gekk afar hægt vegna hálku og hvassviðris en krakkarnir voru mjög þolinmóð og góð þrátt fyrir það. Það var bæði sungið og farið í spurningaleiki. Þá var einnig horft á margar DVD myndir til að drepa tímann. Komið var í farfuglaheimililið í Laugardal um kl. 23 eftir 9 og hálfan tíma frá Húsavík.
Það var góður andi í hópnum og keppnin gekk vel. Margir bættu sinn persónulega árangur og örfá héraðsmet féllu.Hópurinn kom heim með 3 gull, 8 silfur og 3 brons.
Verðlaunasætin voru:
Atli Barkason varð annar í 60 m hlaupi, hástökki og langstökki í 11 ára flokki.
Óskar Ásgeirsson varð þriðji í 60 m hlaupi í 12 ára flokki.
Brynjar Örn Arnarson varð annar í 60 m og 200 m hlaupi í 15 ára flokki. Í 200 m hlaupi setti hann nýtt héraðsmet.
Dagbjört Ingvarsdóttir varð önnur í langstökki 16-17 ára.
Elvar Baldvinsson vann hástökk og 60 m grind, hann varð annar í kúluvarpi og þriðji í langstökki í 15 ára flokki.
Jana Björg Róbertsdóttir vann 800 m hlaup í 15 ára flokki.
Hjörvar Gunnarsson varð þriðji í 400 m hlaupi 16-17 ára.
Auður Gauksdóttir varð í 2-3 sæti í hástökki 15 ára.
Að auki voru margir ofarlega í sínum aldursflokkum, margir bættu sín persónuleg met og allir höfðu gaman af. Hafdís og Hlynur settu héraðsmet í 600 m hlaupi í 13 ára aldursflokki pilta og stúlkna.
Hópurinn sló saman í pizzuhlaðborð á laugardagskvöldið, sumir horfðu á mynd og aðrir voru að spjalla. Lagt var af stað til baka um kl 4 á sunnudag og gekk heimferðin fljótt og vel fyrir sig enda vegir orðnir auðir.
Sjá nánar úrslit mótsins á www.fri.is
